2024-06-02 WIC 第一站 葡萄牙 FUNCHAL
115 115 people viewed this event.
適逢今年WIC 25週年,Doon Sir 決心挑戰呢個系列賽!
WIC全年一共有五場比賽,分別喺葡萄牙豐沙爾、法國雷恩、中國哈爾濱、瑞士伯恩,同埋德國柏林舉行。呢個賽事制度好特別:每個 Class 1 比賽前20名會有分,而 Top Class 比賽則係前50名有分。參賽者只要完成最少三場比賽並且成功取得分數,就可以上到排行榜。
所以,即使你跑完五場但攞唔到分,最終都會榜上無名;而就算你贏咗兩站攞非常高分,但因為只係參加咗兩場,比賽成績仍然會被清零,亦係榜上無名。因此,參賽嘅策略規劃同毅力就成為賽事中嘅關鍵所在。我地拭目以待Doon Sir今年嘅表現啦!
WIC 第一站 – 豐沙爾
呢場比賽喺葡萄牙一個風景如畫嘅小島上舉行,賽道係沿海邊繞圈,真係超級靚!可惜Doon Sir 喺賽前受傷,唯有帶傷上陣,最後跟隨第二主車群衝線,總排名第21,啱啱錯失攞分機會。好消息係,佢喺年齡組別中攞到第二名,成功站上頒獎台!呢個係佢第一個馬拉松獎項,算係一個好好嘅開始!
希望Doon Sir休息一星期之後,快啲養好隻腳,下星期喺法國再創佳績!