2024-09-28 德國柏林馬拉松 (WIC 最終站)
118 118 people viewed this event.
黎到九月底,又係柏林馬拉松嘅大日子!呢個活動唔單止係跑步同埋滾軸溜冰界嘅盛事,亦都好似一場「大考」,睇下大家呢一年嘅努力成果。自從2015年開始,卓嘉每年都會組隊參加,由最初嘅兩三個人,到而家越嚟越多新面孔加入,近幾年都有十幾人浩浩蕩蕩跟住Doon Sir出發。大家都以挑戰自我為目標,要完成一場「Inline 全馬」,或者係刷新自己嘅PB,爭取最好名次。
而柏林馬拉松之後,Doon Sir 亦終於完成佢嘅WIC 之旅,跑晒五站世界盃,最後成功打入總排名第15名,完美結束呢個旅程!
覺得一場Inline馬拉松不夠挑戰性?今年我哋又多三位同學成功挑戰double marathon!
Inline馬拉松通常喺星期六舉行,而跑步馬拉松就緊接住喺星期日。喺咁緊湊嘅賽程中,運動員要應付唔同類型嘅負荷,對佢哋嘅體力同精神意志都係一個好大嘅考驗。喺2016年,Doon Sir成為第一位完成呢項壯舉嘅香港選手,而卓嘉至今已經有9位Double Finisher啦!
順便講講,今年柏林滾軸溜冰馬拉松已經改咗做市內繞圈賽,同以往環繞柏林市一圈嘅路線相比,無論係路線設計、比賽氣氛、定沿途風景都好唔同。所以,無論喺生活定比賽,都唔好等到所有條件都「ready」先至行動,因為機會往往一閃即逝。每一次挑戰都係突破自我嘅機會,把握機會,想做就去做!