2025-03-30 國際輪滑馬拉松巡迴賽 – 上海站
粉紅隊正式登場！🎉
呢支Team Pink一開始係為柏林而設的，後來慢慢發展成環遊世界去”滾” 嘅隊伍，而且隊員大部分都唔係專業選手～今次比賽我哋有好多新隊員第一次參賽，有啲人成功完成比賽，有啲就唔得，但大家都不約而同話今次體驗好好，學到好多嘢，真係好正！
永不放棄係關鍵，Doon Sir第一個WorldSkate 比賽冠軍！
但講到最重要嘅，係永不放棄嘅精神！Doon Sir就係最佳例子，有心未怕遲！佢6年前先開始認真練馬拉松，經歷咗好多高低起伏，由一開始連塵都食唔到，到今日終於贏咗佢人生第一個馬拉松冠軍，仲係國際級賽事嘅冠軍，實在非常激動！
比賽時，Doon Sir 果斷放棄跟主車群走，專注盯緊主要對手。雖然均速可能有啲劣勢，但佢靠住多年經驗，好聰明咁控制比賽節奏。最後喺 1 小時 20 分鐘嘅比賽入面，佢凴住係最後大直路嘅爆發力，以 0.5 秒嘅超微弱優勢勝出，完全展現咗比賽智慧同強大心理質素，睇到我哋都熱血沸騰！🏆
新隊員嘅挑戰
再講返我哋啲新隊員，今次比賽真係唔容易。今年上海天氣超凍，起步時只有6°C，路況又比想象中差，對體能同肌肉都係大考驗。有啲人跌低咗，有啲俾人推撞，甚至有啲走錯路，但佢哋都無放棄，一直盡力去完成比賽。到最後，有啲人成功衝線，有啲就遺憾地完成唔到任務。
雖然結果有喜有悲，但過程比名次更重要，相信佢哋每一個都玩得開心，睇佢哋完賽後嘅燦爛笑容就知啦～😄
輸咗？下次再戰！
所以，對於今次未能完成，或者輸咗嘅朋友，唔使灰心！繼續練，下次再戰，一定可以做到更好！
下次見！
P.S. Doon Sir 嘅驚喜
原本 Doon Sir 只係計劃參加呢一場比賽，點知而家佢喺排行榜上領先緊，搞到佢心思思想參加埋其他賽站，大家真係要拭目以待！👀 期待佢再創佳績！
睇完相記得去片呀！
Photo Credit: 聖巴文化、匯跑賽事