Name: 2026-03-29 香港公開賽 2025
Start: 2026-03-29 14:34:56

2026-03-29 香港公開賽 2025

今年男子組表現令人欣喜！霍一言喺12歲以下組別短途、長途同接力三戰全勝，勇奪三金；小將們都成功頂住壓力，成功摘下接力亞軍; 方天衡喺13-14歲組別穩紮穩打，收穫兩金。最叫人振奮係1000米賽事，卓嘉隊橫掃前五名，完美展現平日苦練嘅成果同團隊默契！
反觀正在調整期的女子隊的表現未如預期，只得陳月言在成年組中得到獎項。希望她們經過今次比賽後吸取經驗，為下一場比賽努力，完成進化！

我哋再一次迎來三金得主，今次嘅主角係——霍一言！💪
仲記得上年一言仲係跟喺師兄後面跑嘅小師弟，眨下眼今年已經可以擔大旗做大哥哥。今年見證住佢技術、體能同心理質素都有好大進步，特別係面對賽場壓力嗰份淡定，真係成熟咗好多。希望一言可以繼續帶住呢份謙卑同熱誠，去更廣闊嘅賽場飛馳，繼續大展身手！

我地除咗有「黑戰隊」之外，今次我哋仲派出咗一班「白戰隊」嘅新血參賽。呢班同學仔雖然年紀細細，加入卓嘉隊都只係短短一兩年，好多仲係第一次正式踏上公開賽嘅戰場。
雖然係「初哥」，但正所謂初生之犢不畏虎，最令我哋欣慰嘅係，呢班同學仔完全無怯場，甚至發揮出超越平時練習嘅水準，嗰份拼勁真係令人喜出望外！
而當中最令大家驚喜嘅，一定係第十組嘅 3×250米接力賽。 🥈

三位第一次出賽嘅同學仔，喺強敵環伺之下之下完全無退縮，靠住平時累積嘅默契，穩打穩紮咁攞到呢面銀牌。對我哋嚟講，呢面銀牌嘅含金量絕對唔低過金牌，因為佢背後記錄咗大家由零開始、勇敢去挑戰自己嘅每一步。
睇住「白戰隊」喺賽場上全力以赴，令人更加期待佢哋嘅成長。希望卓嘉可以做到一代又一代嘅承傳，由大哥哥大姐姐帶領住師弟妹，將呢份對滾軸溜冰嘅熱誠同拼勁一直傳落去。
其實訓練並唔難、要堅持落去先係最難。玩運動要有成績要用「年」去計，而過幾年後係唔係真係有成績係冇人知，亦可能你玩幾十年後都係輸俾同一個人，所以每一個為運動而堅持的人都已經係人生贏家。