2026-07-11 法國 Le Mans 24小時耐力賽
今年，卓嘉再度領軍，帶住一支34人嘅團隊遠赴法國，出戰 Le Mans 滾軸溜冰拉力賽（24h Rollers du Mans）。今屆我地分途出擊，Checker Formula 參加 Prestige Enterprise 組別，Checker Fempower 挑戰 Prestige Women 組別，Checker Dreadnought 出戰少年組，另有 Master 及 Solo 選手參與。對卓嘉嚟講，今次唔單止係一次遠征，亦更加係考驗我地整體部署同應變能力。
最終，我哋成功收穫兩冠一亞，絕對可以話係揚威海外！！🥇🥇🥈
Le Mans 一向係滾軸溜冰界最具代表性嘅賽事之一，不過今年比賽遇上歐洲熱浪，大會最終臨時改制，令原本部署好嘅節奏同安排都要即時調整。對所有參賽者嚟講，今次比賽最大挑戰，唔止係高溫，仲係點樣喺突變之下保持冷靜。
Prestige組別方面，Checker Formula 今次交出一場極具代表性嘅逆轉勝。比賽初段一度陷入落後，形勢非常嚴峻，但團隊並無急躁，反而慢慢穩住節奏，等到機會出現再反擊。最終，CF 喺比賽尾段完成絕地反擊，頂住體能同壓力嘅雙重考驗，成功逆轉對手，奪得組別冠軍。由落後、反超，到再度陷入劣勢，最後完成逆轉，呢面金牌充分反映咗我哋喺逆境中嘅韌力同信念。
女子組方面，Checker Fempower 則由頭帶到尾，成場比賽都保持住領先優勢，穩定發揮之下順利封后。佢哋嘅表現相當穩陣，亦證明咗只要節奏控制得好，就可以喺高壓賽事中保持主導。
少年組方面，Checker Dreadnought 同樣有好表現，四隊互有領先，差距一直非常接近，直至最後階段都未能分出勝負。雖然最後以十多秒之差飲恨，但全程鬥得相當精彩，亦展現出年輕選手嘅競爭力同潛力，對佢地嚟講亦係一次好寶貴嘅經驗。
至於 Master 及 Solo 組別，則以完成賽事、享受過程為主。喺極端高溫同突發改制之下，能夠順利完成已經唔容易，亦令整趟法國之行更具意義。
今屆 Le Mans，對卓嘉同整支團隊嚟講，唔只係一場比賽，而係一次關於應變、信任同團隊精神嘅考驗。面對熱浪同變化，34人遠征法國，最後換嚟嘅唔只係成績，仲有一段難忘而深刻嘅共同經歷。
SportSoho 2026 年9月號報導
